RSS

Sunday, February 21, 2010

فــوت فــى الــضى


الله حي
الله حي
وسع سكه يمر الضي
شيخنا العاشق
جي وراشق
سهمه وماشي حديً بديً
الله حى
الله حى
وسع سكه يمر الضى



ياسيد يا بدوى يا سيدنا الحسين
مدد يام هاشم يا كحل العينين
مولانا الرفاعى
يا طب الأفاعى
ياسيدى ابراهيم يا دسوقى
انتو فين
باندم عليكم ياأهل الطريقة
وجوايا شوق للغزل والحقيقة
وبرايا عالم بيشعلل حريقة
فزعنى ولسعمى وكوى قلبى كىّ



الله حى
الله
وسع سكة يمر الضى
شيخنا العاشق
جى وراشق
سهمة وماشى حديً بدي
الله حى
الله حى
وسع سكة يمر الضى



انا عشقت سلمى وغانم غواها
وانا لما باعشق مابارجعش اتوب
تاخدنى المعاصى
آدم جدى عاصى
وانا راضع معاصى
وشبعان زنوب
ولوقالوا عشق المحاسن خطيه
ألم الخطايا
وافوز بالعطية
واسافر بحلمى
سعيد المطية
عزيز الخطاوى
مايلوينى شىّ



الله حى
الله حى
وسع سكة يمر الضى
شيخنا العاشق
جى وراشق
سهمه وماشى حديً بدي
الله حى
الله حى
وسع سكة يمر الضى



وغانم ياسلمى يحب السلامة
ولجل المغانم يبيع العمامة
ويبعد ويقرب
ويعشق لمأرب
وف الجد يهرب ليوم القيامة
وأنا اللى ف هواكى سبقت المعاد
يا سلمى ياعشق البنات والولاد
وطلعت صورتك
ف كل البلاد
وكبرت فيها الأمل فى اللى جى


ّ
الله حى
الله حىّ
وسع سكة يمر الضىّ
شيخنا العاشق
جى وراشق
سهمه حديً بدي
الله حىّ
الله حىّ
وسع سكة يمر الضىّ



ياسيدنا الأمام ياحسين يا شهيد
وهلبت عالمورأيك سديد
لمين ود سلمى
ف شرع الطريق
ومين القريب
ومين البعيد
ومين اللى باقى
ومين اللى شايل
ومين اللى طايل
ومين اللى يثبت
ف وقت الهوايل
ومين فينا ميت
ومين اللى حى



الله حىّ
الله حىّ
غانم رايح
عاشق جىّ
شيخنا الشايب
ماشى وسايب
كلمة بسيطة لأهل الحىّ
كل ماتمشى قدم ع السكة
كل السكة ماتشبع ضىّ



الله حىّ
الله حىّ
فوت ف السكة
تشوف الضىّ




حلقة ذكر
احمد فؤاد نجم

التصويرة الأولى
التصويرة التانية

Thursday, February 18, 2010

هو الكلام يتقاس بالمسطرة

.
فى يوم صحيت شاعر براحة وصفا
الهم زال والحزن راح واختفى
خدني العجب وسألت روحي سؤال
أنا مت ولا وصلت للفلسفة

.

وقفت بين شطين على قنطرة
الكدب فين والصدق فين ياترى
محتار اموت.. الحوت خرج لى وقال
هو الكلام يتقاس بالمسطره؟

.


سمعت نقطة ميه جوه المحيط
بتقول لنقطة ماتنزليش ف الغويط
أخاف عليكي م الغرق، قلت أنا
ده اللي يخاف م الوعد يبقى عبيط
.
عجبي
صلاح جاهين

Wednesday, February 17, 2010

ضيعت مستقبل حياتى

.
ضيعت مستقبل حياتى فى هواك
وازداد علىّ اللوم وكتر البغددة

حتى العوازل قصدهم دايما جفاك
وانا ضعيف ما اقدرش احمل كل ده

إن كان جفاك يرضى علاك وانا ف حماك
عفو الحبيب ما يكونش أحسن من كده

علمتنى يا نور عيونى الامتثال
واحتار دليلى بين دلالك والجوى

كنت افتكر حبك يزودنى كمال
خيبت ظنى والهوى ما جاش سوا

تبقى سبب كل التعب وتزيد غضب
ده اللى انكتب فوق الجبين مالوش دوا



لحن سيد درويش

عن دور ضيعت مستقيل حياتى

فرقة بيروت للموسيقى الشرقية