RSS

Monday, March 23, 2009

المرجيحة


متأسف
مع إني عارف
إنك لسه متعلمتيش
تزعلي من حد..‏

كنتي صغيرة خالص

لما كنت بازقك بالمرجيحة
الطالعة النازلة..‏

وفجأة سبتك

وسبت الجنينة كلها
وكبرت..‏

دلوقتي لما بافتكرك

في جنتك اللعبة
بتراقبي العصافير

فاكراها بتتمرجح وياكي
وأبص لنفسي
مابلاقيش بيننا أي فروق

غير يمكن حبة أحزان

اتشعبطوا فيا
كأنهم أولادي..‏

بصراحة أنا باتلكك
وانتي اللى جيتيلي برجليكي امبارح فـ الحلم
والصبح لقيت نفسي هنا..‏

أنا عارف
إنك لسه مابتعرفيش تستهجي الحروف
وإن باب الجنينة أكيد صدّى
بعد عشرين سنة
من الأكسدة المتواصلة‏
وعشان كده
مش هاتخطى حدودي..‏
أنا واقف بره أهو

ومش طالب منك
غير ضحكة واحدة

بس تكون بأعلى صوت عندك..‏
يعني ممكن تضحكيها
لحظة طلوع المرجيحة
زي عوايدك..

ضحكة واحدة بس
عشان أتأكد..‏

إنك لسه
موجودة.‏

محمد خير
من ديوان 'بارانويا'