ا" دعنى أرحل.. فى لحظة ضعف منك أعطيتنى حريتى فأحببتك، وفى لحظة قوة تريد أن تسلبها منى. لا.. لن أساوم على قلبى فالحب لا يقبل المساومة. الحب حرية.. عناق بين حريتين حيث تشتعل الحياة وتتوهج. دعنى أرحل عن عالمكم هذا، عالم الرجال السخيف، حيث لا يرون فى امرأة جميلة غير موضوع للقنص والاقتناء، سأترك ذلك كله خلفى، بارادتى، ولن أذرف عليه دمعة واحدة.
دعنى أصرخ فى وجه هذا العالم حتى تتناثر أشلائى فوق تراب الأرض، فربما .. ربما استقرت فى زهرة نبات برى أو فى حوصلة طائر مهاجر.. دعنى"
"وانا مين عشان اموت؟..ده انا مفيش في ايدي كرباج ولا نبوت.. ده انا ديكتاتور صغير يادوب لسة في حضانة.. باتهجي اول حروفي في القهر والاهانة.. و من كتر خوفي من خوف ابن الجبانة، والكذب والخيانة قلت اعمل ديكتاتور. ولو ان لسالي كتير عشان اكمل علام.. واخد في ايدي الشهادة.. شهادة الديكتاتوراه.. والعب لعب الحواة.. وافسد الحياة.. وادوس علي الجباه.. واشعلل الحرايق.. واظلم الخلايق.. واطيح في خلق الله.
كارمن هي اللي حرة.. وانا اللي ديكتاتور.. وانتوا عايشين كمالة.. ولا عايشين عوالة.. ولا كمالة طابور،
كارمن رمز الحياة.. وانا اللي شرير وقاتل..
الدنيا من البداية محترفة في صناعة الشخص الديكتاتور.. من يوم بدء الخليقة مش قادرة تحمي حق، ولا قادرة ترد ظلم، ولاقادرة ع الحقيقة، ولاتمنع ديكتاتور من كل صنف ولون من قهره للعباد. تعالوا نشوف ونقرا في كتاب الانسانية انواع مالهاش نهاية من الديكتاتورية
فيه ديكتاتور سياسي وديكتاتور حماسي..فيه ديكتاتور قراري وديكتاتور حواري.. فيه ديكتاتور فظيع وديكتاتور وضيع وديكتاتور رقيع.. فيه ديكتاتور غبي وديكتاتور ذكي وديكتاتور عبيط.. فيه ديكتاتور حويط وديكتاتور قليط فيه ديكتاتور مهزأ وديكتاتور ملزق.. فيه ديكتاتور شقي وديكتاتور عفي وديكتاتور عجوز.. في ديكتاتور شجاع
..وديكتاتور زمان غير ديكتاتور الزمان ده
الديكتاتور زمان كان زي جينكيز خان وهولاكو وريتشارد وموسوليني وهتلر
الديكتاتور معشش في وجدان التاريخ وفي قلب الانسانية..وكل واحد فينا جواه ديكتاتور
بصوا علي اي حد وحققوا هتلقوا موجود اهوه تحت جلده بقايا الديكتاتور
انا عشقت كارمن.. كارمن لحن الحياة والحرية الطليقة والاغنية البريئة.. بتهرب من سناني للناب الاولاني لمخالب ديناصور. سايبين الكون بحاله بظلمه وظلامه وجايين عليا انا وتقولوا ديكتاتور.. وظلمت الانسانية.. وكارمن النبيلة ضحيتي الجميلة قتلها الديكتاتور.
،ايوه قتلتها
طب انتوا عملتوا ايه.. ساكتين من بدري ليه..ماقلتوش لأ ليه. عشان ما بتقولوش طلعلنا قراقوش ومليون عفركوش.. ده غير اللي ما نعرفوش من كل شكل ولون..
بالذمة انا ابقي مين في وسط دول..انا ديكتاتور لسة بلية عند معلم كبير بيأمرني انفذ وانتوا ساكتين.. دنا بتلكك بيكم.. واتعكز عليكم.. وعشمان لسه فيكوا.. انكوا تقولوا لأ.. نفسي اسمعكوا مرة تقولوا لأه قوية للديكتاتور اياه الكبير..
قولوا لأ وانا معاكوا
قولوا لأ للامريكان وللصهاينة ولعنف الاحتلال.. قولوا لأ لكوبنهاجن بلاش ذل والهوان.. قولوا لأ وبلاش نفاق
قولوا لأ للي حاصل في الخليج وفي العراق.. قولوا لأ للمدابح في جنوب لبنان..اقفوا مع كل ثائر في القدس والجولان.. قاطعوا في يوم البضايع والوجبات السريعة وافساد الطبيعة
اصرخ..اصرخ بعزم صوتك وانا هقول معاك
قولوا لأ للحروب.. قولوا لأ للمجاعة..قولوا لأ للتآمر.. قولوا لأ للخيانة.. قولوا لأ للخضوع.. قولوا لأ للخداع.. قولوا لأ للي باع ولسة هيبيع..
قولوا لأ والسلام" . ا
منيــــــــــــــــــــر
فيـــــــــــــروز
جاهيــــــــــــن
مارسيـــل خليفة
وجيـــــــــه عزيـــــــز
يحيـــى غنــــام
فيروز كراوية
كاميليا جبران
على الحجــــــــــار