1
لسه .. باقلّب في كل كتاب
بالقى التاريخ مقتول
زيّي
زيّ الزمن فاتُه يكون موصول
وزي أحلى صحاب
2
بانتحر من فوق سحابةْ حزني
يُلقفني الفرح صاحبي
لكن مجنّني ..ا
الحبس بين جدران شجر سنِّي
واكمنّي
باحب الصعب .. صاحبني ..ا
فرَح مدهون بصبغة الألوان اللي هيّا ..ا
ألوان .. كما السجان تكمّمني
تكتّفني
وممكنْ ..ا
في أي لحظه بالتأكيد .. ح تقتلني
6
لا زَمَني ده
ولا .. هوه زمنك
ولا فرحي ..ا
هوه أكيد فرحك
ولا أي كلام، عاشق معشوق
طالع أبدًا من قلبك
شايفُه على جسر شفايفك مدّلي ومخنوق
زي المطر المتعلّق برّه قزاز الشبابيك
ونا .. ا
أنا كنت باحب اللحظه الدفيانه
أدفا
أفرح
أتجنّن
وأنا أصلاً بالفعل أجنّن
زي الموجه الحيرانه
بين شط إيديك ..ا
9
إبحر
بحّرت
غيّر
غيّرت
وهمست: ا
أنا مش قادر
صبري من قلبي مهاجر
والشاطر يعرف
على أي مراسي راح يرسى
ولا يقسى على حلمه القادر
10
لايق
لايق عليكي توب الفرح
لايق
لايق عليّا هدوم الغربه في المسا والصبح
لايق علينا الوهم .. جوّه غيطان الجرح
لايق .. ومش لايق
ولا قلبي رايق .. ولا فايق
يرفع رايات الاعتراض .. ا
أو السماح بالصفْح
13
في عصر التحرير، في ميدان التحرير
إتحررتْ في ليله
لاكنّي طول عمري أسير
للحلم اللي عاش بيعاني
للحلم اللي اتولد قتيل
والمستحيل
شجر النخيل
يفضل مِطاطي .. يطاطي
في زمن فرحُه حزين وبخيل
20
يا زمن الحزن الغامض غطّيني
دفّيني
عرّيني
إرميني
على شطوط الفكر المهجور
يا زمن الفرح المرعوب على دمعةْ صمتي المصلوب
اربطني على سدرك
أتدفا بنبضك
بهمومك .. ا
بالألوان الزرقا في خطوط رسمك
لاجلن غصب عني
راح أغني ولا ليّا هروب
صبارةْ قلبي راسماني
عاشق أحزاني في زماني المقهور
عارف .. ا
جايّاني
21
عارفك تافهه
رايقه وخايبه وعاشقه وحابّه ..ا
ورافضه الفرحه الصعبه
رافضه النار .. والورده
دهبك .. فضّه
شمسك شارده
زيّ جميع التصريحات
زيّ زماني الخايب
زيّ نهاية الحكايات
38
كل الحكايات
اتزيّفت
زي الشوارع
في مناقصه عامه، اتسفلتت
زي أي لحظةْ حب خايفه ..ا
خافت ونامت وراضيه .. تكون هايفه .. ا
جوّه حضن الشرنقه
واللي بقى
من كل دي الحكايات
كلام .. ما يعرفشي الوفا
علشان كده ...ا
من حياتنا هرب
الحلو .. لحظة صفا
والجميل .. ا
راح .. واختفى
41
حزني .. ا
هوّه نفسُه .. ا
هوّه حزنك
وحتى فرحك
جوّه حضنك
هوّه فرحي
هوّه فرحك
زمني .. زمان
زمنك .. ليلاتي، لنهارده باكرهه
و .. ا
هوه برضه غصب عنّه .. وعنّي وعنّك
برضه كارهني
معلش
حزني
حزني مش لاقى مطرحُه
