ليل جبان

-1-

الليل مخيف
واليفط على الرصيف أشباح
ومنين اجيب قلم كبير على قد احزانى
وانا قلبى طفل ماحقلوش يرتاح
صوتى ده ولا ارتعاش قنديل بيطفيه الهوا
خايف عليكى
ولا منك
ولا مالاتنين سوا
عد السنين اصعب من انها تتعاش
عشرين سنه احزان
عشرين سنه غربة
عشرين سنه ناكره
وبكره اقول بكره
وبكره اقول بكره
وبكره جه وماجاش


-2-

الليل حزين
والالم على صدرى نازل عصر
انا اغبى اغبى المخلوقات
عشش ف صدرى العنكبوت
ليلاتى اصحى من الممات واموت
أنا السكوت...
ابن الهزيمة اللى اتنعت بالنصر
ابن الهزيمة اللى اتولد محنى


-3-

وادق باب من بعد باب
مقابلش غير وجع السؤال
انا اللى نفسى فى الغنا
ودايماً ينحبس صوتى
وانتى اللى نفسك ف العيال
حملك دايماً كداب
حلمك دايماً يدبحنى
ماعرفش غير العطش
يوماتى يفضحنى
مش لاقى حق الرغيف
والاسم بنا القصور


-4-

الليل طويل
والديابة كتير
الجوع نقش على صدرها ياما
تصحى ف دوامة وتبات ف دوامة
تقفل شبابيكها
وتلم ف شباكها
وتموت ليالى كتير على موتى
ملعون ابو سكوتى
ملعون ابو سكوتها
احسن لنا نصرخ
احسن مانتألمش


-5-

الليل تابوت
مبينكسـرش

ليل جبان- من ديوان لحظة هروب
منتصر حجازى